Alor kossa i ansèrv so sète pèrsone-la ?

Son répons lété sinp : an promyé défande La Rényon ! Mète azot dakor lo bande 7 pou défande La Rényon épi bann rényoné… Biensir sa la pa in répons i pé trouv dann la konstitisyon La frans. Normalman bande député élu issi, i doi – konm toute lé zot député – vote épi diskite bann loi la Répiblik.

Mé si ni di sa, ni mète anou dann kontradiksyon : Nou lé rényoné, noute problème lé spésifik in péi lé dann loséan indien é noute problèm lé pa san pour san sète La frans – légzagone si zot i vé. Noute kontradiksyon i fé ké nou-an touléka bonpé rante nou-i pans lintéré loutremèr donk lintéré La Rényon lé pa défandu konm k’i fo.

Pou rézoude lo kontradiksyon mi anparl néna lo bann loi la désantralizasion épi la dékonsantrasion. Mé noute toute i san bien bann loi-la i sufi pa pou done anou lo pouvoir pou fé avans noute péi suivan sak ni pans dann fon noute kèr. Arzoute èk sa la plipar bande gouvèrnman lé souvan défoi bonpé jakobin é zot éspri lé santralizé é pa déssantralizé. – souvan défoi zot lé jakobin in poin sé tou.

Même bande député i dovien jakobin : inn foi ankostardé, kravaté, anbarké dan l’avion zot koté rényoné i éfass in pé, é zot koté jakobin nouvo i pran lo dessu… Sak lo madam dann radio i di sé in réaksion konte sak mi sorte di. Pou noute par, nou PCR ni pans i fo ranfors la déssantralizassion, fé baskile ali dann lotonomi pou nou défann noute zintéré konm k’i fo, avèk la fors inloi konstitisyonèl i pé done anou.

Pou nou rovnir dsi sak mwin la ékrir an-o la : in bon solidarité rante bande député La Rényon épi bann zélu noute péi an zénéra-arzouté avèk sa toute bann fors vivl, sa lé bien nésséssèr. Mé dsu kèl baze ? Lo pli pti komin dénominatèr ? Sa i risk pa sifir pou nou san in bon ranforsman noute santiman épi noute konsyans rényoné.

Justin