Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Dérègloman klimatik, la pa pars ni anparl pa tro ké klima i dérèg pa

mardi 21 out 2018, sanm Justin

Mi sort lir in nouvèl dsi in l’androi i apèl Lacanau : in l’androi bann surfèr i koné bien é li tonm dann sid La frans parla koté la Gironde. Dann nouvèl-la i di konmsa dopi dé syèk é dé syèk la mèr i avans é oplis i avans, oplis i avans vite ; si tèlman l’avé in gargote-banna i apèl sa in barak frit - néna kék dizène z’ané lété dsi l’ban lo sab é demoun té i sava shèrch do koi ranpli z’ot boujaron. Koméla lo landroi lé an plin dann la mèr.O larj Baba !

A ! Mi antan déjà désèrtin apré di : akoz i parl anou toultan zafèr déor, zafèr lé loin épi i konsèrn pa nou. Zot i pans nou néna poin asé problèm konm problèm travaye, problèm demoun apré arvaz anou, épi tout sort kalité problèm la vi. Tanpir pou lo réshofman klimatik ! Kan la mèr v’arivé, li v’arivé ! Akoz l’apré rabash anou toultan in vyé rèv Paul Vergès la fé dsi son vyé zour ? Nou na poin arienk sa pou pansé.

An 2050 tèl shoz ! An 2100 tèl shoz ! Dann dizan tèl z’afèr ! Asé siouplé ! Fé pèr d’moun sé sa k’i intérès azot bann l’éspès rouj de fon. E alé ! Siklione lo van va souf pli for ! Alé dolo la bou va koul partou ! Alé linsandi, alé la séshrèss. La route v’alé dan la mèr ! Moin pèrsonèl mi èmré i di amoin tout va roul ron. Tout va bingn dann luil ! Mi èmré bien i di amoin dé shoz konmsa. Mé mi kroiré pa pars mi koné bien la pa konmsa ké lé shoz va spassé.

Astèr si ni arvir dsi Lacanau lo tré d’kote i rokil rant dis épi vinn sink mète shak ané. Dann l’ivèr 2013-2014 plizyèr gro tanpète l’arash konm in riyin lo bann l’anroshman : bèl ta galé antassé pou fé konm in ranpar. Sa i pèz dé tone é dé tone, sa téi fé bèl bèl baraj mé la pa fé in pli. Si sa l’ariv laba, akoz i arivré pa isi ? Akoz i arivré pa mMaurice, ousa bannzil Karabaty sar fine randu ? [1]

Mi boush mon zorèye é mi antan pa ! Mi fèrm mon zyé é mi oi pa ! Mi tak mon boush é mi koz pa ! Dérègloman klimatik, la pa pars i anparl pa tro ké klima i dérèg pa !


[1Mi pouré galman anparl bord’mèr Sin-Lui, la rout shanborn, lo far lo por épi ankor l’éspès sité l’apré fé dann sin-Pol, lo por, La possession, épou pa obliy ali nout formidab rout an mèr. Ak sar l’afèr !


Inn modékri, inn ti lavi, inn komantèr ?

signaler contenu


Facebook Twitter Linkedin Google plus