I pé pa dir la roganizasion la Frans lé sinp. I pé mèm dir li lé konpliké. Nana l’Éta, nana bann Réjion, nana bann Départman, bann Kominoté d’Komine, bann Komine étsétéra-étsétéra, la ké lo ra. É kan nou lé la, nou la pankor di koman sa i marsh, avèk kèl larzan, kèl sé son konpétans... parl pi koman i fé lo kontrol... Bon, mi arète la pars moin na in kamarad k’la pa invant zèf bouyi la di amoin : « Justin, inkiète pa, sa lé sinp sa kontrèrman sak ou i kroi ; tout i may tout ansanm, tout i fé tout é résiprokman ».

Moin la pans, si in moun konmsa lavé fé zétid, kroi amoin baya !, li nora été bon pou fé pran d’moun blan pou noir, makaroni pou la bouji, po d’shanm pou pla kouvèr... désik pou dé sèl, sansa pou piman ;
Aprésa, moin la kalkil in kou pars moin la fine antann, in pé sé in bann kador pou vréman, kisoi Préfé, kisoi Ministr, kisoi Zournalis déssi RFO ou bien Antenne.. Bin zot ossi, zot i koz konm mon bann dalon : mi koné pa bien o jus si zot i koné pa konm k’i fo lo tik-tak la désantralizasion, sansa si zot i fé sanblan pa bien konète, ou bien si zot la fine konprann koman bien roul demoun kari sou d’ri... Na in zé i apèl kolin mayar : ou i anmar in foular déssi lo zié in moun i apèl lo mèr, aprésa i tourn le moun an ron plizanpli vite ; ziska k’li koné pi son dovan èk son déyèr, lo sièl avèk la tèr, an o avèk an ba, la droite avèk la gosh... Lèr la li lé bon pou kroir ninport de koi...
Oui mé solman, pou moin, sé in mank réspé, épi lé pa konmsa k’i fo pou fé marsh la désantralizasion. Pars san réspé, na poinn solision ! Réspèkt amoin, m’a réspèkt aou ! Déréspèkt amoin, m’a déréspèkt aou... Ala koman mi konpran la vi piblik... konmsa é pa otreman !

Justin