Mi koné pa si an parmi mon bann léktèr nana in pé té pansyonèr dann Lisé, sansa dann in koléktivité. Mé sak lété, i koné bien, kan manzé lé bon, i ariv dé foi ké lo dèrnyé pou sèrv ali, na pi tro kari pou li. Sa té vré osi, dann tan, kan la famiy té gran épi la mizèr té for : donk si lo momon la oubliy fé la loi d’légalité, in zour lé riskab inn dan la bann i manz arienk ri sèk avèk la sos poi, piman krazé. Mé si ni sort an déor d’lo problèm manzé koas sa i vé dir ozis ? Sa i vé dir, si ou lé dèrnyé, kék par, pou réklam out droi ébin lé pa sir ké, solon la zistis, ou sar ranpli avèk out droi. Bon ! mi koné pa si zot lé d’akor avèk moin, mé dann in sosyété d’mank bokou d’shoz sé konmsa ké sa i éspas. Alé ! Ni artrouv pli d’van !