Médam zé Mésyé, la sosyété, koz èk moins é koz èk in kouyon, mé sé o péyé d’lo mir k’i oi lo bon mason. Mézami, mi pans, zot konm moin, ni koné provèrb konmsa. La pa ké mi pans an parmi bann kroiyan néna in kantité i kroi plito lo dyab ké lo Bondyé. Tout fason, mi pé di sak mi di, mé moin la pa influan la-dan… Mi rapèl moin la étidyé, kan moin lété lisé, in pyèss Molère téi apèl « Lo Tartuffe » in fo dévo, donk si zot i vé in fo kroiyan, zistoman in dyab garé zis koté la kroi. Mi sava pa anparl azot sa, mé si zot i vé, mi pans zot i pé trouv ali dsi YouTube, késtyonn fèr azot in lidé dsi la késtyon. Mé pli zénéralman, mi pé dir azot moin néna orèr demoun i amenn la vi konm i zoué in rol.finalman, zot lé pa frans é sa séin kalité d’moun mi aprésyé pa. Alé ! Mi kite azot rofléshi la dsi é ni artrouv pli d’van. Sipétadyé.