Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, moin lé sir bann rouj-de-fon i sava fé tout in wati-watia pars gouvèrnman la désid kontrol bann domandèr l’anploi pou oir si zot i rode travaye pou d’bon. Bann rouj, konm bann sindika i sava kriye konm koshon l’apré piké. Pou koué ? Pars pou zot bann shomèr – tout bann shomèr – i rode travaye matin o soir é si zot i trouv pas é pars la poin pou vréman. Pou zot lo pov i manti pa, lo pov i yèm lo travaye, é li rode, li rode, li rod mèm mé kroiyé moi é fouté vou d’dan. Tok ! Pran sa pou toué !

Justin la fé pou répons :

Mon vyé matant i koz toultan la boush rouvèr, mi antann bien sak ou l’apré di. Mé an rotour mi yèmré ou i jir amoin kroi d’boi kroi d’fèr si mi manti mi sava dann l’anfèr si bann pov i fé la frode bann rish i fé pa ditou la frode. Dizon zot lé pur konm in pti kabri i tète ankor son momon. Mi yèmré ou i di amoin bann rish i fé pa la frode avèk z’inpo zot i doi, i anvoye pa zamé z’ot larzan dann péi étranj é si néna in n’afèr pou péyé, zot i fé la vitès pou pèye sak zot i doi gouv èrnman.

Alé ! Manj m’a péyé don matant, mi profèr in moun i sèye grosi in pé son pla si li la poin lo nésésèr, plito k’in moun l’apré toufé afors manzé, i kontinyé toufé anplis k’i fo. Mi di pa bann pov lé pli onète ké bann rish, ni ké bann rish lé pli malonète ké bann pov, mé mi trouv désèrtin néna z’éskiz ké d’ot la poin. Tok ! Pran sa pou ou.