Sé konmsa ké mwin l’aprande in bonpé d’moune téi vé anpèsh bande tourist épi bande voiyazèr rante La Rényon, l’èr issi l’avé pwin tro d’moune la gingn la kovide é laba l’avé in ta avèk in paké. Sé konmsa ké mwin la konprande bande plantèr lété la plipar d’tan favorab in linpo dsi linportassion sak zot i produi issi. Sé konmsa ké mwin la aprane in takon d’zafèr.

Possib, pa possib ?

Wala la késtyon é mwin té i antande galman lé zom politik i fé pa si, i fé pa la, i vé pa si, i vé pa la.

Késtyon : nou la déza rode si bande zom politik néna in pouvoir la dsi sansa si zot na pwin okin pouvoir. Si zot la pwin lo pouvoir, initil ni bate noute lang an tro. Si zot i pé, ala in n’ote afèr.

Figuire azot mwin la parti rode dsi linternet kossa téi di dsi la loi déssantralizassion é mwin la vi lo pouvoir lo préfé téi pass rante lé min prézidan konsèye réjyonal ou sète prézidan konsèye départmantal – é lo kontrol par avanss lé ranplassé par nin kontrol apré.

Mé oila l’afèr : opliss i déssantralize, opliss lo préfé néna pouvoir é opliss bande zom politik na pwin pouvoir pou fé sossi é pou fé sola. L’èrla mi di amwin konmsa, si nou rényoné nou la bézwin noute zélu i pran tèl étèl déssizyon, é zot i pé pa, sa i vé dir la réjyonalizassion la pa parti dann sanss k’i fo. Donk lo sankilotism la sorte par la porte pou rante par la fénète

Alor pétète i fodré rogarde in pé bien sète afèr la, sansa mi panss pa nou va avanssé pliss ké sa.