Dann “Témoignaz” samdi i invite demoun pou détak la lang. Biensir la bien bézoin, pars si ou i gard tout sak ou i pans pou ou, la pa in bon n’afèr. Pou kosa, solon zot ? Pars, moin lé sir, dann la tète bann Rényoné nana bonpé zafèr. Konm Mitterrand té i di, nana la paye, mé na galman lo grin. Rant lé dé, demoun i profèr lo grin pars li na plis valèr, mé la paye galman zordi la fine pran la valèr ; mé sa sé in n’ot afèr.

Tousa pou di kosa ? Pou di sinploman, dann nout tète nana dé shoz lé pa konsékan, mé na dé shoz, an kontrèr, lé konsékan. Dizon, noré katrovin-dis pour san bann shoz lé pa konsékan, mé i arès kant mèm dis pour san dé shoz lé konsékan. Donk, si in moun i di pa arien, lé vré li sar pa di katrovin-dis pour san la banalité, mé li sar pa di non pli lo dis pour san k’i vo la pène. Pou koué i fo li di sak i vo la pène ? Pars, konm di lo kont, ni viv an parmi l’moun, ni viv dann in péi, dann in sosyété, donk i fo ni aport nout ti galé pou mète anlèr la mézon komune.

Pou mon par, mi pans pa arienk bann moun diplomé, instruyé nana z’afèr pou dir… sak lé pa diplomé, sak lé pa instruyé, li ossi nana z’afèr pou dir. Moin na kamarad i di amoin souvan dé foi : "Arète fé la démagozi Justin !". Moin mi pans pa sa i apèl la démagozi. Pars, oplis mi marsh dann shomin la vi, oplis mi oi lo bout i tard pa pou arivé, oplis mi arvien dsi sak moin la fé, dsi sak moin la di, dsi sak moin la pansé momandoné, é moin lé blizé romark lé pa toultan moin l’avé rézon. Mi kroi mèm, si moin l’avé ékout bann ti kolon, moin noré myé avans dann shomin la vi. Lé vré pou moin, lé vré pou tout demoun mi pans.

Épi kozé, sé di galman sak ou nana dsi lo kèr. Bann doktèr i apèl sa in térapi é sa lé inportan. Détak la lang, oui, sa lé nésésèr. Mé démay ossi lo kèr ? Sa lé pli nésésèr ankor.

NB :"Détak la lang é démay lo kèr" : lo tit in liv fonnkèr Axel Gauvin, in ga i sort gingn "la méday lé lète é lé z’art". I mérite ali, fransh vérité.

Justin