Noute zoinal Témoignages la pass in tèks li la ékri — son testaman avan l’èr — avèk dë poin prinsipal : promyé poin li domann bann morissien d’vanz pou lotonomi alimantèr. Li téi konsèye bann famiye plante in pyé fouyapin dann la kour pou pa soufèr la fain in zour. Dézyèm poin li vanz ossi pou la lang kréol morissien : li di bann zanfan morissien i doi aprann lir ékrir dann zot lang matèrnèl é lang-la sé lo kréol morissien.

Dev Virashawmy l’avé in gran lamour pou la lang son péi pou lo kréol é sirman, pou nou bann kréol loséan indien ni sorte pèrde inn an parmi bann pli gran lékrivin dann in lang kréol… Li lété in léspéssyalist la lang, in romanssyé, in dramaturge, in fonnkézèr épi galman in tradiktèr bann gran ékrivin klassik. Momandoné li la fé mèm in fondassion pou bien fé rante kréol dann lansègnman son péi.

Sanss larz li té in om politik é li téi porte vréman atanssyon la vi politik son péi. L’avnir son péi épil lavnir son pèp téi trakass ali. La prèv, kan li la aprann li l’avé in gran maladi é téi rèss pi ali bonpé lo tan pou viv, li la done in linterview dann zoinal Le Mauricien avèk dë méssaz, nou la fine dir sa anlèr-la é noute zoinal la fine anparlé.

Mi di pa nou rényoné ni doi prann son lésson tèl kèl, mé ni doi galman fèr atanssion pou noute l’avnir : noute lotonomi alimantèr lé pankor assiré mèm si lo tan i préss. Noute lédikassioin nassional i marsh pa tro bien é sirman sé pars i tienbo pa konte konm i fo noute lang kréol rényoné… Dev, koté wi lé, mwin lé siréssèrtin si wi pé ou va vèye dsi bann nassion kréol dann loséan indien é pétète pli loin k’sa pou ède anou travèrs la zone tanpète k’i atann anou.

A bon antandèr, salu !

Justin