Mézami mon kozman pou la route i komanss zordi konm in dovine-dovinaye. In pé v’apèl sa sirandane, d’ote v’apèl ali sinploman dovinete. Mwin mi kass pa la tète pou toussa provik ni konpan kossa i lé é do koué ni koz.

In pé va di sinploman sé in fèye vakoa é zot i koné fèye-la néna troi ranjé zépine é si wi évite inn, si wi évite dê, antanssion lo troizyèm lé la pou pike aou. Sé lo ka bann demoune i shanj lopinyon pli souvan k’a zot tour konmsa zot l’apré sèye mète azot dann kouran gagnan é mi pé jir azot néna pliss demoune ké ni kroi k’i fé konmsa.

Dann la lang franssé i apèl sa : manz dann plizyèr ratélyé osinonsa shanj lopinyon konm i shanj shomiz. Mi pé dir azot déssèrtin moune mi koné la fine pass dopi lo rouz, ziska lo roz, an passan par lo blé, pou ariv in zour dann lo noir. D’apré zot sa demoune sinssèr sa ? In pé i di la pa la zirouète k’i tourn sé lo van, mé si ni parl lo van, avèk la zirouète nou lé bien lwoin la fidélité épi la sinssérité.

Mi kite azot rofléshir la dsi é ni rotrouv pli dvan, sipétadyé !