Zot i koné kosa i lé la guèl marmite ? Sé lo rouvèrtir. An kontrè lo fon marmite, sé sak in pé i apèl lo ki. Zot i koné marmite-la sa i zoué in gran rol dann ménaz pars sé dann marmite i kui manzé. Mé kosa k’i éspass kant in ménaz i antan pi. Konm i di galman kosa k’i éspass kan la fine bril la paye. Promyé z’afèr i kui pi manzé é kan i kui pi manzé souvan dé foi lo zonm lé maléré. Sirtou kan la famiy la donn ali in l’édikasyon pti prins i konfyé tout in bann kalité z’afèr pou fèr lo madam : kui manzé li ! Nétoiye la kaz li ! Prépar linz li ! Mi souvien in madam, fitintan nou té mitoiyin, té apré donn son z’instriksyon son fiy té i antan pi avèk lo mari : promyé z’afèr ou i fé si ! Dézyèm z afèr ou i fé la ! Biensir kui manzé téi vien an promyé pozisyon. Donk lo madam té di son fiy : ou i fé kui manzé pou out z’anfan épi pou ou, apré lav lo marmite, dévir guèl an-ba. Moin lé sir avèk bon konsèye konmsa, lo ménaz lé sové. Alé, mi lèss azot rofléshi la dsi é ni artrouv ppli d’van sipétadyé.