Afèr mi anparl de sa ?
Pars dabor inn, nout parti i anparl ko-dévlopman. Pars dann son kozman sis novanm 2009, Prézidan Sarkozy la anparl dévlopman andojène li ossi. Li la di ékspréséman, nout l’avnir ékonomik lé ossi dann la réjyon ni viv. Konm ni viv dann l’oséan Indyin, ni pé pa dévir lo do avèk bann péi-la.

Gnor péi nout bann zansète ?
Ni vé, ni vé pa, na in bann péi nout kèr lé blijé d’ète anmaré ansanm. Mi vé anparl péi nout bann z’ansète. Koman i pé gnor sa ? I pé pa gnor l’Inn, péi nout z’ansète tamoul, épi lo Goujarat, péi nout z’ansète zarab, Madagaskar, Komor, l’Afrik dé l’èst, la Chine, Vietnam. Lé ga, koman i pé oubli sa ? Tout nout z’ansète i sort pa la Frans... sa lé sir-é-sèrtin.

Lé natirèl ni rogard banna
Donk si ni anparl ko-dévlopman, i fo ni arfé byin z’ami avèk banna. I fo ni dévlop èk zot in solidarité, profitab pou nou, profitab pou zot. I fo ni arète avèk bann zès i sépar anou èk banna. Konm par égzanp pa fé la MCUR : moin lé sir, si in bonpé rant nou lo kèr la singné, mi pans banna ossi la pa konprann in n’afèr konmsa.

Arzoute èk sa, i fo pa ni fé préférans, i fo pa ni rozète in pé, pars nou va afébli anou par nou-mèm. Bann Fransé i di, i fo pa mète tout son zèf dann in sèl panyé… pars si lo panyé la kapoté, katastrof ! Mé sirtou, dévir pa lo do péi nout bann z’ansète.

Justin