Ièr matin mi lir dann nout zournal in gayar kozman k’i di : « La défète solman na poin famiy ! »-lé orféline si zot i vé. Sa lé bien vré ! In prèv si zot i vé an avoir sé sak i spass pou dézyèm tour bann primèr la droite. Zot i koné isi, bann la droite la domann vote pou Sarkozy é in pé la domann vote pou Zipé. Sanm pou moin, pèrsone an parmi lo bann gran kador la domann vote pou Fillon. Mank de po, sé lo Fillon ké l’ariv promyé é lé posib, son l’avans lé tèlman gran, ké sé li k’i gingn lo dézyèm tour. Alor, bann kador la droite la dévir palto san atann. Konm i di dann la bib, lo kok n’ora pa fine shant troi foi ké zot sar fine trayi. Solèy té pankor lové ké la plipar té fine domann vote pou Fillon é bann partizan Zipé, la mèm pèrd la voi, zot lé anroué.

Pou kosa mi di sa ? Pars, moin lé dann in parti i ashète pa koshon dann goni, i domann a oir si son dantisyon lé korèk, si li lé kosto, é konm di lo kont si li lé bien korporé. Sé la sazès mèm k’i komann anou pou fé konmsa. Donk la sazès té i doi komann bann gran kador la droite ké zot i poz késtyon lo bann kandida, ké zot i domann lo program pou La Rényon. I done pa in shèk an blan in kandida, i domann ali kosa li vé fé é sirtou pou bann péi l’outreèmèr pars i parétré dann lo troi déba ké la fé, dann télé, la koz dis ségonn solman dsi l’outre-mèr. Sé dir ké ni kont vréman konm in pis dsi in grenn z’éléfan.

Parti kominis la zamé fé konmsa. Li la touzour ékri bann kandida pou domann azot kèl sé z’ot l’intansyon par rapor a nou. Solman apré li la domann vote pou intèl sansa pou in n’ot. Mé, konm zot i koné, parti kominis sé in parti rényoné é sak i kont pou li sé lo z’intéré son pèp épi son péi. Pa forséman la kours pou la viktoir. Zot i koné, nou lé pa pou lo dévirazlé palto.