Matant Zélida la ékrir Justin :

Mon shèr nové, mon pès salté,rouj-de-fon dovan l’éternité,
Souvan dé foi mi lir aou. Pa pou aprann dé bone shoz, mé pou konète koman out léspri la fine torté par raport sak zot i apèl l’idéolozi d’lo parti. Dizon in sort tramay k’i trap désèrtènn shoz é d’ot li trap pa é d’apré sak mi konpran li lé konm programé pou sa. Moin pèrsonèl, mi trouv zot tramay sansa zot filtre la pa bon pars la pa sa k’i done in bon léktir la sosyété. Par égzanp, zot l’apré kriy toultan : "Donn kréol travay !" alé oir sé pa lo travay i kont sé lo nivo d’vi ou nana kisoi avèk larzan travay, kisoi avèk larzan loiyé, kisoi ankor avèk larzan pansion, sansa tout manyèr an avoir la moné épi manyé ali pou gingn zoinn lé dé bout par l’milyé. L’èr-la, i pé di La Frans lé kolonyal si zot i vé, mé sa i pèrmète shakinn gingn son soso. Alor siouplé, ramas in pé zot band-rol pars sa in n’afèr i pas pi. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, ala ké zordi ou i diskit dsi la filozofi : la valèr di travay ! La valèr lo an déor-travay ! Mé matant mi rogrète dir aou si ou na poin in bon travay ou i gingn pa out vi konm k’i fo..amoins ké ou i brikol dann in séktèr malonète. L’èr-la, kisoi la moral bourzoiz, kisoi la moral kominis,kisoi la moral rolizyèz,sa sé in n’afèr i pé pa aksépté dann la sosyété. Solman si ni parl travay i fo, sanm pou moin, oir dann kèl séktèr ou i travay. Sak ni roprosh lo pouvoir kolonyal sé an avoir anpèsh anou dévlop konm ki fo nout bann prodiksion, sé d’avoir bar lo dévlopman nout fors prodiktiv, nout l’agrikiltir, nout l’indisitri, nout pèsh épi tout sak i fé k’in péi na in lékonomi dévlopé ou ké li na poin in lékonolmi dévlopé.
Lo travay, pou nou kominis, pou nou bann kont-kolonyalis sé sak i pèrmèt aport in plis-vali, donk donn plis la valèr lé shoz. In légzanp : ou i pran in pyè d boi, ou i débit ali an plansh, èk lo plansh ou i fé mèb,sansa ou i garni out kaz pou abat la shalèr ébin matant sa i vé dir ou i aport la plis- vali. Ou i donn plis la valèr lé shoz é an rotour ou i gingn in salèr, sansa in rovni. Dévlop lo péi matant sé donn la pli vali lé shoz. Sé sa ké ni vé é sé sa ké nou la pa antann dann la boush prézidan Hollande. Pou li la pa bézoin in plan pou dévlop lo péi i fo fé konm sak li nana dann son tèt. Pou nou kominis i fo dévlop lo péi avèk in plan ké lé bon pou nou. Tok ! Pran sa pou ou !

Justin

NB In patoi pou La rout : "zoinn lé dé bout par l’milyé !" sé kan ou i ariv a trap la fin n’moi avèk out larzan lo moi san ète a sèk momandoné. Bann pov, la finn moi i i ariv lo kinz lo moi, dé foi avan. Bann moun friké, zot i mank zamé lo voul, é zot i pass zot tan pou gonf zot pla.