Mézami prézidan Macron i sorte prète sèrman pou son nouvo mandatir. Mwin la bien pèr nou néna arien d’bon pou atande pou son nouvo kinkéna. Mé ni pé sézi lokazyon pou anparl bande zansien prézidan é an parmi pou la mandatir Sarkozy.

Zot i rapèl Sarkozy la roganize in zéta zénéro pou bande péi l’outremèr é li la fé la sintèze toussala laba dann Paris. Li la di plizyèr zafèr té intéréssan é anparmi li la anparl lo dévlopman andojène – i pé di ossi otosantré – é sa i vé dir roganize oute dévlopman dann landroi wi lé é pou nou sé loséan indien. La pa nou nora di non, pars si nou lé pou lindyanoséani nou lé pou sa. Si nou lé pou lo ko-dévlopman avèk bande zil loséan indien nou lé pou sa. Dann noute kèr nou la pans, ala in prézidan la fini par konprande nou lé dann loséan indien é sé la ké ni doi roganize noute fitir.

Mé oila lété dsi la fin son mandatir é la pa ronouvèl son bail. Mé oila galman ké la nouvèl ministrèze loutremèr, la konpran lé shoz bizarman : konm in téknik pou apiye dsi bande péi l’outremèr pou ranfors lékonomi fransèze, kapar bande marshé, épi rogoumante lo pla la franss dann toute landroi néna in péi l’outre-mèr… In drol fasson oir lé shoze : lo péi loutremèr lété pi konsèrné, mé la puissans néokolonyal oui, é sé èl téi doi tire lo bénéfiss dann lo dévlopman andojène. Alé pa di ni kroi pèrnoèl, alé pa di ni konpran pa franssé ! Ni konpran nou, mé sé lo néokolonyal k’i oi lé shoze alanvèr… alé pa di sé la droite, pars Hollande kan li l’ariv o pouvoir é bin li la aplike doktrine-la, avèk konm rézilta sèrv noute pozission dann loséan indien pou bien instal La franss é borde anou dann fon la kivète.

Si tèlman ké momandoné ni égziss pi dann la Coi (commission loséan indien) é nou téi tir okin lavantaz. Alor mézami, dévlopman andojène ni vé bien – dévlopman oto santré, sa lé bon pou nou, mé pou nou tir lavantaz noute pozission anou dann loséan indien pa pou agrav lo poi lo néokolonyalism.

Arète fé pran anou po d’shanm pou pla kouvèr. A bon ékoutèr, salu !

Justin