Mézami sète afèr léstatu sé in kékshoze okipe vréman mon léspri é pa dopi arienk koméla. Si ni vé koze vré, m’a dir azot dopi 1959 mwin lé partizan lotonomi pouy La Rényon, an touléka pliss lotonomi :

– Pliss ké dann tan nou lété dom épi gouvèrnman téi pratik issi in politik l’assimilassion.

– Pliss ké dann tan kan la pratik in politik dékonsantassion épi la done lo préfé in kazi-pouvoir gouvèrnère dann noute péi.

– Pliss ké kan la fé la réjyonalizassion sirtou avèk lo lamandman virapoullé épi in politik lintégrassyon.

Mézami, mi di azot fransh vérité, lé domaze bande la droite épi gouvèrnman gosh é droite, la kal an plin vol la politik noute kamarade Paul lété apré améné dann konsèye réjyonal : mi panss nou lété pli avanssé ké zordi dann in bonpé domène. Domaze pou nou, pars san lo kou d’aré nou narté fine bien avanssé zordi… Domaze pou léstatu la réjyonalizassion pars lété lokazyon oir pou vréman kossa li téi i pé pèrmète anou fé pou fé avanss noute péi. Doaze pou sak i konte la dsi é arienk la dsi pou nou avanssé.

Mézami néna arienk in fasson pou oir la kapassité d’in léstatu sé d’pouss ali oboute pou oir ziska oussa li pé alé – la loi sé la loi, mé la zirisprudanss lé tazantan kapab rouvèr bande baro tro étroi. Mé oila, nou la pa gingn lokazyon pouss o boute é sé pou kossa zordi ankor nou lé anpèshé konète kossa ni pé fé dann in kontèks ziridik ni koné dopi in koupe de tan.

Dann d’ote séktèr ni koné ni pé pa zordi alé bien loin : par égzanpe pou lanploi piblik. Par égzanp ankor pou lo transpor par aviyon. Par égzanpe pou bande trété gouvèrnman la sign dann noute do pou konkiranss anou dsi noute prop marshé intèryèr... Bande z’APE par ébzanpe.

Sak i koné i koné, é sak i koné, di demoune siouplé pars si nénain zour in fénète de tir i fodré pa ni loupe ali. Avèk lo lanboulkidi néna koméla étone pan ou si in fénète de tir i prézante.