Mon bann dalon, moin lé sir zot va pans ankor zordi mi yèm rabashé, répète lé shoz, mèm si l’èr-di - tan i donn pa moin rézon dsi in késtyon inportan pou nou, la késtyonn dévlopman nout péi La Rényon. Pars zot i koné, é néna dé tan é dé tan l’idé lo dévlopman La Rényon sa i gide amoin konmsi lété mon fil rouj-pou pa shanjé bien antandi.

Donk mon fil rouj sé lo dévlopman La Rényon, pars, pou moin, konm pou in bonpé d’moun mi éspèr, in priorité pou lékonomi La Rényon sé son dévlopman pars ziska zordi sé in n’afèr nou rényoné nou la loupé - kroisans san dévlopman, départman atipik, survie, shanjmann lojisyèl, Paris i komann pan ou, in bann mo i éslik anou bien apré plis troisan sinkant zané lo pré zans fransèz nou la mank nout dévlopman étap apré étap alé oir d’ot la réisi sète zot.

Listoir nout lékonomi sé sa, si mi tronp pa : la koloni i fabrik ar pa in sèl klou ! Nou va viv dann la monoprodiksyon kafé épi do sik ! La Rényon sar in téritoir d’kontoir pou lékonomi La frans sansa sète l’ erop ! Nou sar aryéré dsi la késtyon sosyal : traite bann zésklav épi lésklavaz konm krime kont l’imanité, angazism-angazé, é pou fini akaparman tout la rishèss rényonèz par bann sosyété éktèryèr : kisa i posède La Rényon zordi ? (Temoignages du 19 juillet 2019)