Témoignages - Journal fondé le 5 mai 1944
par le Dr Raymond Vergès

Lakey lo sit > Chroniques > Oté

Dévlopman : Nou lé kapabe ! Mé akoze toussa kalpate pou anpèsh anou avanssé

samdi 27 novanm 2021, sanm Justin

Mézami, apré lo modékri mwin la fé yèr, néna in moune la pass amwin in kou d’fil é in savon an mèm tan. Mi koné pa kissa lété, mé mwin la bien rozistr sak li la di : li la d’mande amwin si zoinal Témoignaz l’avé pwin d’ote shoz pou fère ké pass la pomade dann do bande blan. Li téi di ankor la guère rante bande kapitalist la pa noute afèr. Sak i fo pou nou sé gagn noute sosso é pou fini par : lo lou dan la bèrjri sé ou Justin.

Mon bande dalon, zot va domande amwin si kozman-la téi blèss amwin ? Mi réponde azot, sa i blèss pa mwin ditou pars néna arienk la vérité k’i blèss é sak lo moune la di la pa la vérité ditou. Mi di épi mi rodi, sak i blès amwin sé kan i atake mon péi é d’apré mwin, sé tan issi, mon péi lé ataké.

Par ki ?

Par bande kapitalist déor édé par lo gouvèrnman, l’apré vol toute sak nou néna, toute sak nou la fé avèk noute min dann noute listoir, difissilman, pars nou lé konm zot i koné dann in sityassion dominé-in sityassion dominassion néo kolonyal l’apré domine anou plizanpliss é vol noute bien. Noute patrimoine si zot i vé. Vole noute lindistri kann, vol noute bande sossyété imobilyère, vole noute konpagni l’aviyon, vol ankor noute shène télé épi toute sak i spass an soumarin é ni an appèrssoi pa toute suite mé kan ni apèrssoi, sa i fé mal a nou.

Pou sa i mète noute bande travayère dann shomaz, pou sa i étinde lénèrzi noute pèp, pou sa i poze anou kantité kalpate pou anpèsh noute péi dévlopé.

Zot i panss pa konm mwin ? Ébin alor pou koué néna tan é tan d’shomère dann nouté péi ? Pou kossa apré 75 zané départmantalizassion nou lé dann in sityassion mal dévlopman konmsa ? Pou kossa lénèrji noute bande jenn, noute bande zélite lé bridé konmsa ? Nou lé kapab. Sirésèrtin nou lé kapab mé kapabe fé kossa kan noute bande prodiktère néna lo fèr dann pyé.

Mézami, kozman i pé done amwin i fé pa sif mon zorèye mé la sityassion in pé l’apré mète noute péi.



Inn modékri, inn ti lavi, inn komantèr ?

signaler contenu

Plan


Facebook Twitter Linkedin Google plus