Nou la fine koz plis in foi dsi lo mal dévlopman nout péi é nou la fine di, pa arienk in foi nou la rate lo train dévlopman é pa arienk in foi-zordi dévlopman dirab konm i di sa. Mi pans in pé i majine dann sistèm néokolonyal nout dévlopman lé posib é moin lé sir galman in pé i fé sak zot i pé pou trap nout dévlopman, mé si néna désèrtin i réisi dann z’ot prozé pèrsonèl, néna poin in réisite pou lékonomi lo péi an zénéral. Néna dé foi kan ou i pans lo péi i avans, oila ké li bate aryèr sinploman.

Moin lé sir si i fé parl mésyé Apavou é d’ot ankor, ni pé pa an avoir in n’ot répons ké sa.

Pou nout parti, i pé pa shanj la sityasion nou lé d’dan si i shanj pa nout sistèm gouvèrnans. Si nou lé anpéshé rant dann in pèryod résponsabilité pou plis l’otonomi, oplis v’alé, oplis nou sar dann rouj pou bann poin fèb nout péi. Mèm bann poin for koméla, si i kontinyé konmsa, lé riskab afayir. Oplis bann rényoné sar dann kivète pou la késtyonn travaye, pou la késtyonn dévlop nout prodiksyon in tèryèr, dsi lo poinn vizé nout l’intégrasyon dann nout réjyon l’oséan indien, oplis nou sar a l’ékar dann l’indyanoséani oplis sar malizé pou nou trap nout fé klèr. Zordi ni sar arpa pli loin dsi nout poinnvizé, mé nou va arvni la dsi. Sa lé sir !

Mé, moin néna kant mèm in késtyon pou pozé-in romark pou fèr si zot i vé ! Ala li la : si ni pans, dann sistèm nou lé d’dan, si lé pa posib ansort anou bien konm k’i fo, pou kosa – solon moin-ni fé sanblan ni sava gingn ansort anou. Kan ni gingn in pti pozisyonn pouvoir ké la pa lo pouvoir pou vréman, d’apré moin ni fé konmsa… Lé vré kan ou néna in pozisyonn pouvoir i fo ni amenn sèryèzman out manda, mé si nout moun i kroi pèr noël, koman i fo fé pou rouv lo zyé, pou déboush lo zorèye é pou détak zla lang bien konm k’i fo.

Mi poz sinploman la késtyon, é konm in pé i di : « Poz in késtyon sé trouv lo répons ! » Mé la pa si vré ké sa !