Kossa sa i vé dire ? Sinpléman ké in zanfan dsi dë i manz pa konm k’i fo, néna poin loizir konm lé zot, lé privé dsi son linz, dsi son lojman, dsi son moiyin kiltirèl, é bien antandi son léta d’santé i lèss a déziré é son shanss pou l’avnir lé diminyé par raporte lé zot. Soisante-sèze zané apré la loi 19 mars 1946. Zot i trouv pa sa lé for dann in péi i fé parti bande péi pli dévlopé ké néna dann lo monde.

Sa i vé pa dir laba dann La franss napwin zanfan i viv dann bande famiye mizère – é sa sé déza in skandal – mé an proporssion néna bonpé moinss ké shé nou. Sa i vé pa dire non pli la mizère i égziss pa dann bande péi loséan indien sirtou dann sète lété koloni fransèze. Mé mi pé dire azot konparézan-la i komanss fatigué, pars la pa pou sa nou la domande la loi 1946 é nou la gingn in vote a linanimité dann lo lassanblé nassyonal konstityante l’ané 1946.

In bon travaye kominis konm lo député Léon de Lépervanche téi di, mé in bon travaye détourné d’son bite par la suite kan bande gouvèrnman La franss la mète a apiye lo rin bande kapitalist.

Bruny Payet la di avèk mwin

Toussala pou rapèl azot in konvèrssassion mwin la fé avèk Bruny Payet dann tan li lété ankor an parmi nou. Donk li téi di avèk mwin si dann l’ané 1959 lo parti la domande lotonomi sé pars noute bande kamarade téi koné – apré réflékssion – lo sistème l’assimulassion épi l’intégerasion té pa kapabe tire noute péi dann malizé… Pou tire noute péi épi noute pèp dann malizé in sèl solission noute dévlopman, mé noute dévlopman lé pa ppossib li mèm si ni sorte pa dann rézime kolonyal-néokolonyal si zot i vé.

Justin