Mi pans zot i konpran a popré kosa sa i vé dir. Mi rapèl lékol nou l’avé in amontrèr demoun l’avé donn ali in pti nom pou kass ali lé kui. I fo dir in bonpé amontrèr l’avé z’ot ti nom é bien sir té i di pa zot an fas a fas in n’afèr konmsa pars in pé lété pa tro pou flaté. D’ot lété pasab é moin pèrsonèl si moin l’vé gingn in pti nom konmsa moin noré pa véksé. Donk lo moun mi di azot an proyé té pa rar kan li rant dann son klass li oi son pti nom marké : demoun téi apèl ali Cain, lo ga la tyé Abèl. Mé mark in kékshoz konmsa sé gingn in l’intérogasyon ékrite é té sak i ariv souvan dé foi. Nout vanjans sé kan nou téi pans lo boug lété blijé korij nout bann kopi-nout défète té kan li téi donn anou in mové note avèk kék zèr d’kol an plis. A ! si nou l’avé koni lo marmaye téi mark pti nom-la souvan konmsa, lé sir nou noré donn ali lo grin. Pé sfèr dovan nou lété lo pli ipokrite mé domaz nou la zamé koni kisa i lé pars tout nout lipokrizi anou téi ansèrv arien : nou l’avé bo dir ali mésyé gro konm in kaz, nout poi lété o fé kant mèm é la syène ? Ni koné pa. Alé ! mi kite azot rofléshi la dsi é ni artrouv pli d’van. Sipétadyé !