Mi pans, lané 2008, Parti d’la droite la gingn in bon kou d’rèss trankil, issi la Rénion. Mié k’sa, parti kominis, bann prédiksionist lavé di lé mor é antéré, li épi son zalié la ranport inn-dé zoli viktoir. La pa gingn le sipèr galo banna lavé promète ali... Pou anshèv aranz lé shoz, in bann gran taktikèr promièr klass,la niabou galman pèrd la prézidans konsèy zénéral...
Dizon sa lé pa sak i kont pou vréman Pars sak i kont sé lintéré La Rénion. Sak i fo, sé mète ansanm pou kontinié nout shemin dann dévlopman dirab... avèk son bann pilié i apèl lékonomi, le sosial, la kultur ,lanvironeman épi la fason zot i apiy inn déssi l’ot , é rantre zot pou gingn plis lélan pou alé pli vite, alé pli for..Sa i apèl l’inter-action..
Mé i fo kroir na inpé.. sirtou sak la rak fonn marmite le kolonialism, i pans pa konmsa vik zot i em pa bann pèp i marsh débout, pir ksa zot i préfèr in pèp kank li ranp devan zot. Alor la anil inn-dé zéléksion, la désid annuir le mèr Sint Sizane épi la pa arèt kritik la réjion, la mem done la rou pou karsèr aèl, anpèsh aèl marsh konm k’i fo..Dèrnié nouvèl zot i rod salir papié le mèr La Possession épi sèt in résponsab parti kominis....
Nou va oir la suite : kissa va gingné, kissa va pèrd dann sèt afèr-la, mé ni pé dir azot sa in film nou la fine oir...avèk préfé Perreau Pradier, frodèr zéléksion, nèrvis, kas-an fèr,étsétéra, étsétéra... Ni koné ali kaziman par kèr. Touléka, sak i vé arkomans bann mové kou, i fo zot i mète bien dann z’ot koko, Listoir i tourn pa dé foi lo mem film, i shant pa dé foi mem romans. In foi i pass, in déziem foi i pass pa...déziem foi, listoir i béguèy !

Justin