Na dé troi zan dsa, marmay té ankor pti, moin la parti kanpé rout Maïdo, plito rout forestièr i rojoinn tévlav rout Maïdo ; koté Grand ravine, zot i koné na dé troi kiosk ; mon tant té ver té i kamouf biin dan la foré tamarin, té i voi minm pa dépi la rout !

Na in gran mézon té okupé par la méri troi basin ; na in fami la abit laddan ; la kaz fini fermé ; kan zot la viv la, zot lavé dé troi poul, kan zot la parti zot la pa ginyi trap tout ; mi ariv, mi voi poul sovaz i trinn ; koué mi kalkil ?
Mi asèt in kok ; la kout a moin 30 éro ; mi amar ali, li sant kokoriko ; poul i vinn, mi fé in pièz, mi atrap lo poul maron…
Bon mi rès pa la 24 si 24 ; in zour mi ariv lo soir, mi trouv mon kok lé fèb ; i manz pi, i sant pi, a pinn si li tiin an lèr lo soir po dormi…

Landomin, mi konpran : na in gran trou dérièr son do ; mi voi son bann plime fane fané partou a tèr ; sé lak mi konpran : papang la vol an o ; li plane ,li voi in zoli zoizo an ba, li dsann é li atak : pov kok ; blésé,li giniy la fièv.
Avan li mor, mi kine a li, mi fé in bon sivé ; konm sa moin la pa perd tout !!
Alala, so moi d zanvié, rebelot…

Mi trouv moin lé in pé tou sèl lo matin kan mi lèv koté mon park kabri ; mi di ma aminn in kok dé poul ; lo matin li va égèy a moin kokoriko…
Ben sé mon fi la vi ier matin-él na poin lékol lo mérkrédi- « papa,sé koué sa ? »
Bayoun, mi manti pa ék zot : in déziinm kok mor par papang ; zot i koné, li dsann plizanpli ba ; li rod manzé ; konm moin la dégazé po nouri mon kabri ; li voi dan o…
E lo kok o lié d kouri sou la foré ; li rès défann son bann poul ; sé in gèrié ; li défann son téritwar : kèl loson d kouraz minm po nou !
Déziinm kok tié par in papang !

 Justin