Mésyé, Médam, La Sosyété, koz èk moin sé koz èk in kouyon-sé o pyé d’lo mir k’i oi lo mason. Avan parl mon kozman, mi souvien défun mon papa la vi bann promyé krapo ariv La Rényon : i paré la fé vni azot pou manz borèr dann kann pars borèr d’apré sak mi pans sé konm in papiyon i ponn dann kann épi i propaz dodan ziska pouri lo kann karéman. Donk mon papa étan jenn i ariv dsi pon bitor é li antann krapo apré koasé dann la rivyèr é li konpran toutsuit sé krapo pars li l’avé vi sa dann son liv léktir. Donk, alé pa di krapo lé vilin é majine in kozman nou la antann isi shé nou néna lontan. Néna lontan téi di pa : « Shak krapo néna son krapode ! » é sa lé bien vré. Astèr lé posib in krapo i trouv lo moun vilin é sé son droi ali-pa nout droi anou, pars la natir la done anou in réfléksyon, la sosyété la donn anou in moral, sé la dsi ni doi bazé pou nou form nout zizman. Alé ! Mi kite azot rofléshi la dsi é ni artrouv pli d’van. Sipétadyé !