Médame, Méssyé, la sosyété, koze èk mwin sé koze èk in kouyon, mé sé o pyé d’lo mir k’i oi lo masson. Mézami mi koné pa si dan la vi zot la déza été dann in lokazyon mantir pou rand sèrviss in zami, in kamarade, in famiye. Mé a bien kalkilé, sanm pou mwin sa l’été in l’éprèv pou zot. Lé vré ké dann tribinal lé défandi mantir sof si sé pou pa fé kondane in famiye. Mé tribinal avèk la moral i mars pa touzour inn avèk l’ote. La morale i di aou i fo pa mantir. Mé lo droi i di aou dann déssèrtin ka wi pé manti. Astère si ni pran in sirkonstanss la vi, la moral i di aou : « Manti pa ! », mé la vi i di aou : « si wi manti pa wi sava fé kondane oute kamarade. ». Alor kossa wi fé ? Majine ou lé dann tan la guèr, sa i spass dann tan in rézisytanss, kossa wi fé si wi doi kamoufe la vérité ? Lé pa diffisil konète la réponss. Mé wi koné li koné ou la manti é kossa va rèste dann son kère : li va di ou la manti pou sov ali ? Sansa si in zour i ariv zot dé lé pi dann mèm kan kossa li va panssé : d’apré ou li panss ar pa i fo méfyé d’ou pars sak ou fé pou li, ou lé riskab fé konte li, Mi panss i fo bien rofléshi dsi in n’afèr konmsa. Donk mi konsèye azot pou rofléshi é nou va artrouvé. Sipétadyé