Matant Zélida la ékrir Justin :

Mon shèr nové, mon spès salté, rouj-do-fon dopi l’étèrnité, m’a dir aou in n’afèr.I diré, sanm pou zot, tout lé z’ot a par zot tousèl néna tor dann la manyèr oir épi analiz la sosyété rényonèz. D’apré sak zot i kroi mésyé Didier l’apré amenn La Rényon an sharète shaviré é ni pé di an pé d’mo : Didier l’apré plant ali. Mé pou moin lo pli planté dann tousa, sé zot parti é lé konmsa é pa otroman. Tok ! Pran sa pou toué !

Justin la fé pou répons :

Mon vyé Matant k’i koz toultan la boush rouvèr, si ni di Didier l’apré plant ali, la pa par léspri d’vanjans, mé sinploman pars ni apèrsoi li l’apré plant ali pou vréman. Dabor inn li la mète la miz arienk dann la rout an mèr é lo parkour rout an mèr la, lé pavé avèk l’anmèrdman.
Nout tout i koné tout problèm rout an mèr la i trouv dsi son shomin dopi la done lo promyé kou d’piosh... Ni koné osi késtyon finans la rout-la, lé konm k’i diré in gouf-létansalé. Si tèlman in pé i di lo NRL lé riskab fini an katédral kasé.
Arzout èk sa la késtyonn La Rényon la pa solman in késtyonn rout sé in késtyon bonpé pli konpliké é pou trouv solisyon ladan lé pa si fasil ké sa. La Rényon i soufèr in dévlopman insifizan é pou la késtyonn dévlopman i pé pa dir la droit rényonèz, é mésyé Didier an partikilyé, la trouv lo tik tak pou in dévlopman an bon ékilib é sifizan pou nout péi La Rényon.
Mi arète tèrla, pou in boné rézon sé k’in zour, tout de moun va oir lo l’ane Dider Robert, sé inn bourik, in poin sé tou. Tok ! Pran sa pou ou !