An parmi nout bann patoi, na inn mi èm bien. Sé sak i di konmsa : « La lang na poin lo zo ! ». Sanm pou moin, sa i vé dir, ou i pé manyé out lang tor-an-travèr. Ou i pé fé dir ali n’inport de koi san k’out sèrvo i nyabou kontrol ali, san k’ou fé tourn sète foi out lang dann out boush. Nana in n’ot patoi i di osi : « Kan ou i mète in bourik atlé avèk in kalèsh, li pran ali pou in shoval ». Ou i kroi ou nana in sipèr kapasité, pars par kou d’shyass ou l’ariv gingn in plass inportan, alé oir non.

Sa i fé pans amoin Didier Robert, prézidan la Réjyon. Ala in boug i sort di, lo kréol épi la kultur rényonèz, sa in n’afèr dépasé, konm li di : in konba l’aryèr gard. Avan di in n’afèr konmsa, noré pi éspéré lo boug i fé travay in pé son tèt. Si lo kréol sé in konba l’aryèr gard, li pé ésplik anou pou kosa plizanplis demoun i koz kréol rényoné, i réfléshi an kréol, i fé fonnkèr, pyès téat, i diskite épi i fé avans zot ka dann kréol rényoné. Mi éspèr li koné kant mèm Kréol rényoné lé marké dann Konstitisyon la France konm lang réjyonal. Azout, d’apré sak moin la tandi, lo lang réjyonal sak lé plis pratiké dann la Répiblik. Tank’a la kultur rényonèz, moin lé sir sa i aport bokou z’afèr la kultur l’imanité, é la pa moin tousèl i pans sa.

Si ni réfléshi ankor in pé, ni pé domann anou pou kosa in moun, pars li lé prézidan la Réjyon, li san li nana la pèrmisyon pou li dir n’inport de koi, anparl dé shoz li lé pa mètr. Prézidan la Réjyon, sa in post séryé, lé nésésèr an avoir in bon kapasité pou okip sa konm k’i fo. Ou sinonsa, ou i fé bien konsèy aou. Otroman, ou lé pridan dann out kozman. Sansa, konm di lo patoi : I vo myé fèrm son také. L’èr-la, demoun lé riskab prann aou pou in kouyon. Plito ké kozé é aport la prèv ou lé konmsa pou vréman.

 Justin