Mézami, yèr mwin la anparl azot lo soi-dizan otonomi dann l’énèrji a la mode Didier Robert é mwin la di na poin arien a voir avèk sète Paul Vergès épi son bann dalon :

Dann lo ka Paul Vergès sanm pou moin lavé troi poinnvizé : inn diminyé lo bann gaz avèk léfé d’serre é ranplass par in mi énèrjétik prop, dé amélyor in bonpé noute balanss komèrsyal, troi rann anou mète dé nou mèm pou lénèrji.

Lotonomi a la soss Didier Robert sé d’mète anou dsou la koup l’EDF épi Albioma, rand anou dépandan pou deboi par raport l’Amérik, é pou lo bio-éthanol par raporte la prodiksyon l’Ile Maurice. Bien antandi ni pé èspère nora in dminission lo gaz karbonik i arjète dan l’èr, mé lé pa si sur ké sa.

Mé alon fé in konparézon : dann tan Pierre Lagourgue lété prézidan zot i panss in n’afèr konmsa nora été possib. Mwin pèrsonèl mi kroi pa, pars si mi rapèl bien dann tan-la in parti dann la droite lété intéréssé dann la défanss zintéré La Rényon épi bann rényoné.
Antansion kan mèm in n’afèr : défoi mi antan déssèrtin – an parmi mon band kamarade-i di, toute fasson, zafèr kapitaliss la pa zafèr travayèr, é travayèr néna arien a fèr dann lo shoi band kapitaliss… An kontrèr mi panss nou néna a oir, pars lintéré La Rényon lé an zé é ni panss sa sé kékshoz i rogarde anou - nou k’i vé sinploman dévlope nout péi-é démare in pé la korde la dominassyon épi lésploitasyon.

NB Ni doi méfyé band konpador, sak i fé l’alyanss avèk band kapitalist déor é an konplisité avèk zot kont La Rényon, band rényoné épi noute zintéré.