Lané 1974, la fé in sobat-koz rant Mitterrand épi Giscard. Lé dé té apré diskité-dispité, prézant zot program é koatéra. Mitterrand i rakonte, li la vi Giscard trap in fèy papyé blan é mète à lir in gran lète soi-dizan té marké déssi, alé oir té pa marké ditou. Sa i di byin sak i vé dir vi k’lo boug sé in ga la droite manipilasyon... Na poin lontan Sarkozy la rakonte in konvèrsasyon, rant li épi la shansélyèr l’Almagn soidizan té i done ali rézon. La pa manké,li la gingn in boush ta guèl.

Pou kossa mi di sa ?
Pars déssèrtin zom politik la droite, na in mové défo : sharj de lo, pass la pintir. Pou gingn kou ? Pou gingn rézon. Mé konbyinn tan in n’afèr konmsa i pé marshé. In sèrtin tan é apré demoun i fini par kalkil azot, pou sak zot i lé. Prézidan la Réjyon, pou son par, la gingn so maladi-la. Mi koné pa si nana lontan. Mi koné pa si li la tonm dann bouyon-la étan pti ; mé pou ramass mantèr, i pé dir li sé in roi.

Inn-dé légzanp
Li la fé sa pou tram-train. Komansman li la fé lo boug rézonab, k’i jète pa konmsa in gro voyaz larzan, é pou finir li la zété mèm. Li la ziré-krashé ké gouvèrnman va suiv ali dann son route litoral sis voi, épi dann son koméraz dé mil bis. Li la di : « inkyète pa, i pèrd ar pa in sèl éro dann protokol Matignon » ! Konm mi antan dir, i anpèrd ar pa in sèl éro, lé riskabanpèrde toute, pèrde troi milyar... si sa sé in zé pou li, in l’éspor mé m’a dir azot, an vérité, sa i fé pa rir amoin, ni bann zouvriyé batiman, ni bann lantropriz, ni lo kantité shomèr nana, ni sak i vé sinploman La Rényon i dévlop. Pou in passèr d’pintir, sé in passèr d’pintir é danzéré èk sa !

Justin