Na poin si lontan, pétète inn-dé somenn, moin la lir dann zoinal, prézidan La réjyon la koup in pé plis sink milyon dsi lo bidzé la kiltir é lo tit lo lartik lété d’apré sak mi an souvien La kultur kont Lo prézidann réjyon. Aprésa dann télé moin la vi i takonn moun – aktèr kiltirèl d’apré sak zot la di - apré fé in gran bazar dann la Réjyon.

Lé sir si i raz la pint bann z’asosyasion kiltirèl, ou i koup galman bann viv bann demoun i partisip lo laktivité kiltirèl. Lé sir, dann la band té apré fé lo gran bazar néna in pé i sar rotrouv azot san zot boushé d’ri. Romark lo prézidan la di konmsa va roul konmsa ziska lo moi d’jin é aprésa va oir.

Va oir, sa i vé dir li néna léspoir moi d’jin fé vote in bidzé konplémantèr avèk larzan anprété. Mé d’isi la, mèm si i gingn ratrap l’afèr dann sis moi néna in pé zaktivité kiltirèl lo kèr sar fine arète bate é néna in pé lé riskab oir la finn zot karyèr arivé avann komansé.

Mé si ni vé bien artourn in pé an aryèr l’ané 2010. L’ané-la avèk l’ède inn-dé konplis Didier Robert la rash la réjyon dann la min l’alyans. Mé si ni rapèl bien, li la pran dé désizyon é son bann partizan la bate la min : inn lété raport l’énerzi volkan, l’ot lété raport la MCUR, in gran travaye la mandatur l’Alyans l’avé fé pou done anou in gran mézon pou n out kiltir otantik..

Donk sak li fé koméla, la pa fé pou étone amoin, vik bononm-la dopi tan-la é mèm avan sé in l’ènmi la kiltir rényonèz otantik.dizon li sré mèm in révizyonis dann sète afèr-la.