Mézami figuir azot, granmatin-la, dann télé mi sorte antande – pa ékoute pars zot i koné inn é l’ote i vé pa di la mèm shoze-Lo préfé apré parl la route an mèr é konm d’abitide li té apré asplike l’moune koman l’éta-li mèm par l’fète – la fé lo néssésèr. Bref la tyé sète, la blèss katorze, la min dan la min avèk Didier Robert, pou nou artrouv anou zordi ankor konm ni lé. Grojean konm dovan avèk in route i arsanb plizanpliss konm in katédral kassé.

Mi panss léta lokal-aliass Préfé – lété ossi bon dann la route an mèr ké li lé bon dann la zèstyon la krize kovide. Romarke, lé pa étonan pars d’apré sak i sanbe amwin konète, bande o-fonksyonère léta i anvoye l’outre-mèr konm ma mère noré di, la pa la flère d’poi é la pa zordi sa la komanssé – mi diré galman la pa zot sré kapab kass lo kate pate in kanar.

Anfin té apré di, léta la fé son dovoir é li la fé toutesak téi fo fère, konm téi fo fère... A bon ! Mi rapèl pi si léta la pran prékossion pou protèz la natir an suivan lo konsèye bande zinstitssyon pou la préotékssyon la natire issi La Rényon, é laba dann La franns, sansa si zot la anvoye banna dingué. Mi rapèl pi si léta la bien suiv lo travaye kansréti pou oir si na poin tro dépassman d’bidzé, é si toute lé kondission lé réini pou fé in travaye konm k’i fo… Mi rapèl pi tré bien mé a mon avi, mi panss pa.

Méssyé lo Préfé léta lété pa in pti guiguine néglijan dann sète afèr ?

Antouléka li lé fran Méssyé l’préfé kan li di toute larzan léta l’avé prévi pou fé la route an mèr, na pi in sèl fran avèk li, toute lé dann in route domi-fini, domi pa fini par la grande konpétanss méssyé Didier Robert. Mé par l’fète oussa i lé sète-la, i paré li la fine démissione toute son manda é li l’apré rode travaye : in bon travaye konséyèr sré bon pou li d’apré li.

Paul Vergès épi toute bande gran z’ansien la fine pass l’ote koté la du pète a rire kan la antande sa. Didier konséyèr, mé konséyèr d’koué ? D’fou dann fon assiréman.