Mi sort lir in l’intèrviou mésié Didier dann in rovi i apèl l’“Éko ostral”. Bien antandi, dsi la kouvèrtir, nana lo gran figuir lo boug : pason pou sa. Mé sak la shoz amoin in pé, sé sak lété marké par koté. Mi ramas pa mantèr si mi di azot lé marké : « Didier Robert, le l’otonomis ». Moin la frot mon zié épi moin la romark, sak moin la lir lété vré pou vréman.

Poitan, mi di dan mon kèr : L’otonomi, sa in l’idé nout parti la lansé l’ané 1959 dan son promié kongré. Sa sé in l’idé lé rish par sak na d’dan... In zour nou va arvni la dsi. Lé vré, tazantan bann moun la droit la kapar lo mo pou zot, mé pou mèt kèl konténi dodan ? In konténi la pa ditou parèy sak nou la mèt dan nout promié kongré. Mi souvien Paul Bénard l’avé en parl de sa. Na poin lontan, Alain Bénard, son tour, la di li lé pou sa. Zordi, ala mésié Didier i rod, sanm pou moin, fé kroir li osi li lé pou lo mo-la, touléka li lé pa kont.

Lé vré, afors demoun i di nout sistèm lé souflé. Zamé li sar pa kapab règ tout sa problèm nou néna. Fors a fors, in mazorité d’moun i tonm dakor la dsi. In pé, konm lo ra, i komans kit lo bato ? L’èr-la, konm zot na poin tro la mazinasion, zot i sot dsi in mo, dsi in l’idé d’ot la invant avan zot é zot i brandi sa kaziman konm in drapo défalké. Mé zot afèr lé kouzi èk fil blan, konm i di dann z’istoir marmay : "Lo lou abiyé avèk in po mouton !".

 Justin