Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Diégo Maradona mor, foutbal an dèye !

vandrodi 27 novanm 2020, sanm Justin

Mézami, soir-la moin té apré suiv laktyalité é bann zoinalis té apré agass demoun avèk zot kovid-19, épi zot propagann makronik, zot plan dsi la komète, zot kozman prékui dsi zafèr zot i métriz mèm pa é zot lété parti ankor in foi dann in gran diskissyon sanm pou moin i intérèss azot tousèl... épi-sa sé mwin k’i di- toutt in bann sponsor souvan défoi i tir dsi bann fisèl pou fé dans azot konm manekin dann sirk.

Donk mwin téi lèss lo télé koz son tousèl an pansan, pétète talèr nora pass in kékshoz i intérèss awin plizoumoin. Toudinkou, mi wa in band passante é dsi lo bann passante in nouvèl in pé inkroiyab... Mwin téi koné Diégo Maradona l’avé sort lopital apré in l’opérasyonn dan la tète é téi anons galman son réédikasyon donk mwin la pa fé pliss lo ka ké sa. Mé kan lo band passante la ropass in dézyèm kou moin la dréss dsi mon assoir : inkroiyab mé vré, Diégo Maradona, lo gran foutbalèr tout demoun i koné té mor dann son péi i apèl l’Argentine, la lézann, lo zéni, lo éro popilèr.

Astèr mi rovoi dann mon tète band zimaz : kan li lé avèk bann dirizan progréssis, mèm révolisyonèr dann l’amérik di sid, kan li l’apré zoué ballon avèk bann demoun La Plata dann son péi, kan li lé apré antrène lo séléksyon son péi, kan lo pap i pran ali dann son bra. Mi antann osi bann zoinalis apré parl son bann z’adiksyon é toudinkou mi pans "la min Bondyé". Sa la éspass l’ané 1986 kan l’arzantine lété an guèr kont l’Anglétèr pou in bann zil i apèl Malouines.

Pandan la guèr-la la dispite la koup di mond é L’Argentine la kroiz avèk l’Anglétèr. Momandoné Maradona i pass in zouèr anglé, dé, trwa, kat épi lo gol i fons dsi li,li gingn éskivé épi li mark lo bit vinkèr... avèk la min solon déssèrtin, é li li réponn "La Min bon dyé" ; Lo bit la viktoir, lo bit l’amenn son péi pou ète shanpyon di mond...In pti konsolasyon pou son péi martizizé, imilyé par l’armé Anglèz, mé in gran viktoir moral pou lo pèp son péi... Aprésa sé lo jéni, sé la lézann, la mète ali konm méyèr zouèr dsi la tèr dann vintyèm syèk, mèm avan lo roi Pélé, lo gran Platini épi lé zot ankor. An touléka li lé koni dann la planète foot é mèm si li lé mor son lézann lé paré pou suiv ali. Maradona mor, fout ball an dèye partou dsi la tèr.


Inn modékri, inn ti lavi, inn komantèr ?

signaler contenu


Facebook Twitter Linkedin Google plus