Dann bonpé péi i fète la fète bann momon in zour dan l’ané, in dimansh dan l’ané... Pa partou mèm zour é shak péi néna son manyèr pou kalkilé. Boudikont néna par-la dë tiers la popilasyon dsi la tèr i fé so fète-la. Shak péi néna son rézon pou fé la fète-la é souvan défoi d’in péi pou alé dan l’ot lo rézon la pa parèye.

Poitan, sanm pou moin, sré posib in pé partou pou trouv lo mèm rézon pou fé la fète-la, é lo rézon i pouré ète-pou moin-pars nout momon la port anou nèf moi avan ni éné. Sré in bon rézon sa ! Zot i pans pa ? Ni pouré dir ankor apré ké nout momon la port anou nèf moi, èl la kontinyé songn anou, pou grandi anou ziska o moins ni trap nout konésans. Noré ankor in bonpé rézon, mé ni sava pa fé in liv avèk sa.

Kan i parl momon, i parl galman l’amour matèrnèl : sa sé in vré mine d’or pou moin épi pou d’ot ankor. Ou i pé z’ète vilin, ou i pé z’ète malad, ou i pé an avoir tout défo néna dsi la tèr, é pé s’fèr plis vis ké lizine Beaufond, mé si out momon néna dan èl l’amour matèrnèl èl va èm aou, sa lé sir. Arzout èk sa, si dann plizyèr zanfan néna inn pli faye, pli malde, plis frazil, sé sa mèm out momon va donn l’inprésyon èl i yèm lo plis.

Pou aport in bon répons so l’amour matèrnèl, lo zanfan nora lo l’amour filial é sa osi sé in mine do lor. Pars sa sé in santiman i kite pa nou dann nout vi. Mi rapèl in bon kamarad téi di souvan dé foi, an parlan son momon, ma pov vyèy momon. Zordi, li di amoin, èl la fine pass l’ot koté d’la vi, mé pou moin sé konmsi èl lé la é mi pans èl va akonpagn amoin lontan ankor.

Biensir i ariv désèrtènn momon na poin l’amour matèrnèl, é désèrtin zanfan na poin l’amour filyal. Pou kosa ? Mi koné pa, mé mi sipoz néna kékshoz la loupé par-la, in sort laksidan si zot i vé ké la vi la pa ratrapé… An atandan mé zami, si zot néna é moin lé sir zot i an mank pa, l’amour filyal, é si zot bann madam si zot kèr lé ranpli l’amour matèrnèl, dimansh sé lokazyon pou dir dé-troi pti mo sinp d’inn a l’ot épi de l’ot a inn . Sinploman dir : M i yèm aou ! Lé sinp, oui mé lé énorm an plus.