Oté

Diminié lo gaz karbonik, mé toush pa nout gro loto !

Justin / 14 novanm 2007

Lir zournal ièr, zot va oir koman démoun Lafrik lé riskab soufèr in bon pé plis la faim d’issi lané 2020 vik la kantité zot prodiksion zafèr pou manzé va diminié pou moitié. Lané 2100, parl pi, va diminié 90 pou san. Tousa akoz lo fanaz gaz karbonik dann l’èr plis par d’ot ké bann zafrikin zot mèm.

Lérop nana problèm pli sérié ksa : loto, mon fra ! Loto, mi di atoué !
Lé vré, èl i prétan ète an parmi bann bon zélèv pou protèz lanvironnman. Son léspès gouvèrnman, lo komission Briksèl, la désid moi d’févrié diminié lo gaz karbonik bann loto nèv lané 2012, ramène sa 120 gram par kilomète : 120 gram, sa i fé bon pé, si i kont tousa loto i sirkil épi tousa kilomète zot i fé. Mé bann dépité lérop la di : 120 gram lé tro pti pé, mète in pé dsi, épi 2012 lé tro pré, mète sa lané 2015.

Pandan stan-la, bann zafrikin i pé mor d’faim. La pa grav ! I pé an avoir gro-gro siklone, tanpète tousala, la pa grav ! La glas i pé fonn la-ba lo Groenland épi dann lantartik tèr-la koté nou. La pa grav ! I pé an avoir tout sort kalité déga, mé par pitié, toush pa nout gro loto, toush pa li kamèm tousa déga li fé dsi la natir.

Justin