Dopi in bon koup dé tan, la Frans nana kalité gouvèrnman... sa i grat pa l’popièr, mi di azot ! Dann tan Chirac, lavé nonm in sèrtin Raffarin konm promié minis : sa la fé mal bann ti-kolon, sa, soidizan pou z’ot bien ! Afors manifèsté, afors kriy lo nom boug-la dann shomin, nou lavé fini par kroir pli pir lavé poin. Mé sifraz inivèrsèl la donn bann fransé Sarkozy : dizon Raffarin té in zanfan tann koté boug-la épi son bann dalon.

Sharjèr d’lo, razèr d’pint, gran prométèr, pti donèr, anprofitèr, dominèr... Zordi, i raz péyant, domin i raz gratuit. Doboute guète bann rish apré pran z’ot bon tan !

Bann fransé lavé fini par kroir lo boug téi sar aranz z’ot ka pèrsonèl. Kissa téi kroi ? Pti kolon konm gro vaza, zène konm vié, zanfan konm paran, fanm konm zonm, zouvriyé konm patron, proféssèr konm mandarin, vié moun li, andikapé li, shomèr li, rotrété li. Konm par in koud’baguète mazik, tout demoun téi kroi té i sava amélior z’ot ka. Ziska bann z’otaz li té i sar délivré !

Dépi in n’an, li lé prézidan, é bann fransé la fini par débisk ali : dann son kafé, nana triaz. Boug-la i fé proférans : li lé pou bann rish, li lé kont bann pov. Li lé dir avèk bann fèb, épi fèb avèk bann dir. Konm sa mèm, li lé !

Justin