Ni sava koz dsi kosa zordi ? Ni pé pa koz dsi nou mèm, sa lé fatigan. Nou va koz dsi d’moun ? La plipar d’tan lé konmsa é par proférans dsi d’moun lé pa la. Mé par l’fète pou di kosa ? Bone shoz, movèz shoz ? Bone shoz, sa lé rar sa. Movèz shoz ? La plipar di tan. Mé néna kant mèm in problèm. Pou kosa ? Pars si la pèrsone lé pa la, èl i pé pa réponn aou-el i pé pa koriz lo mansonj par la vérité. El i pé pa mète sak lé tort, bon koté : konm i di dann lo droi, lo déba lé pa kontradiktoir é si li lé pa kontradiktoir, li lé pov forséman. Ou i pé di in n’afèr ou i pans lé vré, mé ou lé sir ou la bien vi, bien antann, tradui l’afèr konm k’i fo kansréti dsi lo poinn vizé l’intansyon la pèrsone. Bon l’intansyon, mové l’intansyon ? Zot i oi bien néna pou diskité la-dan é la pa si fasil ké sa pou trouv in vérité dann in kékshoz ou i di. Sé pou sa, sanm pou moin, koz dsi in moun sé pèrd son tan sirtou si li lé pa la. Alé ! Mi kite azot rofléshi la dsi é ni artrouv pli d’van. Sipétadyé !