Mi souvien kan la Réjyon avèk Paul Vergès la komans déside fé lo tram-trin, na in bonpé krétik la grinn dsi li konm gro plui. An parmi bann krétikèr l’avé la droit bète é méshan. An parmi JP Virapoullé, l’avé port son préférans dsi bann kar. Aprésa, ni koné Didier Robert la anprèt lo mèm lidé avèk Virapoullé épi la di li sava mète an sirkilasyon dé mil bis. Ni koné koman la mète lo projé an marsh : ziska zord i oi pa la koulèr lo famé dé mil bis.

L’èr-la, la abandone lo tram train é konm bann Morisien, sanm pou moin, zot na léspri in pé pli klèr ké nou, zot la déside fé in métro lézé pou arète in pé avèk tout l’anboutéyaz nana rant bann gran vil l’il Maurice. Mi di a zot, na dé foi, ou lé kaziman la-ba dann koma sirkilatoir… konm isi o zis… Par l’fèt, mi sort lir dann zournal “Lo Maurisien”, lé prévi lo métro lézè i rant an sèrvis l’amé 2017. Mi koné pa kisa i suit l’afèr, mé mi éspèr zot va nyabou trap zot bi.

Antansion, mi sort di bann Morisien na léspri in pé moin kourt ké désèrtin rant nou. An zénéral lé vré, mé dann lo ka ni sort di, i diré la-ba galman nana in pé i rézone konm tambour. La prèv ? Mi sort lir gran matin dann zournal “Lo Mauricien”, na in ga la déside mont in projé. Ala lo fin mo : li rode mète dsi la rout Maurice in kargézon bis ékolozik fabriké an Chine é li di sa sé son révolisyon. Domaz pou li, sa i diminyé ar pa l’anboutéyaz. Mèm va agrav lo zafèr ! Mon késtyon : boug-la la tète lé pa monté avèk Virapoullé sa, sansa Didier Robert pars i arsanm bien lo vyé rèv dé mil bis. Moin mi pans li di sa zordi pou bar shomin lo métro lézé, mé mi éspèr nout bann kouzin i sar pa lès azot androgé avèk in n’afèr konmsa, i sort tou droit dann léspri la droit bète é méshan.

NB : Mi rapèl kant mèm Paul Vergès té i vé pa solman lo tram-trin, li té i vé osi tout in bann moiyinn transpor, konmsa shak Rényoné i trouv lo moyin k’oi fo ali, dopi son loto pèrsonèl, an passan par son vélo, lo kar, lo trin, téléférik épi tout sak nana konm moiyinn transpor. Lé pa pars in mansonz lé répété mil foi ké li dovien in vérité : mésyé Didier nora du bien kaljkil sa mèrkrodi matin dsi Rényon promyèr.

 Justin