Bann moun la droite la fine pran labitid di ninport dé koué déssi la Mézon dé Sivilizasyon é dé Linité Rénionèz. Mèrkrodi soir dann zournal an kréol déssi RFO, sé lo Virapoullé k’té apré anparl gaspiyaz larzan : 100 milyon euro solon li !

Pou mon par, moin té apré kalkilé. Mi di dann mon tèt é dann mon kèr si bann marmay va vnir an kantité pou aprann nout listoir, nout patrimoine, apran zoué batavèk, bob, roulèr, i sar vni pou konète bann plant i égzis dépi lontan, sa la pa ni in gaspiyaz, ni in pèrt tan. Sa lé byin itil !

Si bann liséin, bann zétidyan, i vyin aprofondi z’ot konésans dan lanvironeman, lo patrimoine, épi tout kalité lénèrzi dirab, sa sar pa in pèrt de tan. Sar pli ké itil !

Si bann touris i vyin pou konprann nout listoir, nout kiltir métissé, zanbrokalé, mi pans zot nana tout pou gingné. Mazine in kou bann touris i sort dann tout péi pou sa ! Mazine in kou k’zot i vyin oir anou, konmsa ni konpran mié lé z’in lé z’ot ! M’a dir azot sa la pa in gaspiyaz ditou. Sa in afèr lé bon pou vréman !

Éstèr, si mi konsidèr dis minite télé dé virapouli, pou moin sa sé in dépans initil, in gaspiyaz, in kozé la boush rouvèr ! In kozé pou pa la boush i pi ! In poin, sé tou !

Justin