Mézami, mwin la fine ékrir in n’afèr ladsi-dsi léta lokal épi la kriz covid. Mwin la fine di é mi rodi ankor zordi léta lokal la dékoné dann sète afèr-la é toute bann désizyon li la prann dopi in an la kriz la komanssé l’amenn anou, inn apré l’ote, droite dann mir… Yèr ankor, mi lir dann zoinal, riyink dann dë moi, san mil pèrsone la rante La Rényon par l’aéropor konm dann in moulin, san pran bann mézir sanitèr é dë moi apré kossa i konstate ? I konstate la maladi la fine fane partou é si i kontinyé lé riskab foute anou dann konfinaz pou in rézilta lé pa gagné a l’avanss.

Mézami m’a dir azot i sifi pa d’koz an mal soufran konm in p éi fé pou fé kroir dmoun i pran bann mézir k’i fo pou ménaz la santé d’moun. Akoute azot bien : mi sava la boulanjri pou ashté in baguète dopin, dovan la rantré lé bien marké i rante pa pliss ké kate pèrsone, i fo pass lo zèl dsi mon min, mèm pou péyé i fo mi pèye avèk mon kart san kontak, apré mi trap mon pain épi mi sava. Bon pou sa mèm ! Mé mi pran l’aviyon, mi débark Zilo, mi fé mèm dézord ké toultan, apré mi sorte an boi karante san ké pèrsone i di pa mwin arien. Mon déga fé, i rèss amwin arienk pou kontaminé.

Dann kèl ka mwin lé pli danzéré ? Dann kèl ka mwin lé moinss danzéré ? Kan mi sava rode mon pain, sansa kan mi oiyaz an parmi kat san pèrsone dann in karling mal aéré, é d’apré sak mi lir dsi zot figuir néna in pé lé déza ataké. Mi poz in sinp késtyon, mé sé déza pou mwin in réponss é réponss-la i akiz dirèktoman bann zotorité d’léta. Dann mon kèr mi di l’avé lokazyon anpèsh latak bann kovide épi bann mutan é oila ké la pa fé, é oila ké kan demoun la protèsté l’amontr azot kèl koté brinjèl i shaj.

An pliss ké sa, kossa i ariv zordi ? I ariv ké la proféktir i dévoil in kontra nou rényoné nou téi koné mèm pa é kontra la i mète diréktoman an akizasyon léta li mèm, létablisman piblik l’ars li mém, mé i fé kroir bann maoré si zot lé dann in trikmardaz konmsa sé par la fote lo movèz zéstyon « bann rényoné ». Ala sa i di é an dsou i ankouraz bann maoré épi bann rényoné règ zot konte rant zote. Koman i apèl sa ?

I apèl sa divizé pou régné, divizé pou komandé ! E lé myé kan sé lo bann viktime shak koté k’i dispite rantre zot. Pandann tan-la, in pé i monte dsi la montagn pou rogarde bann tigr soubate dan la plène.