Matant Zélida la ékrir Justin :
Mon shèr nové, mon spès salté, rouj de fon dovan létèrnité,
Mon nové, si mi tronp pa, ou la vot pou François Hollande ou ? Ou té i kroi lo boug té i sar fé mirak. Ou té i kroi té i sava shanj la sitiasion arienk par in klakmann doi. Ou té i kroi li té i sava obliz l’Erop dévlop in plan b. Ou té i pans l’ékonomi, konm par mirak, té i sava ardémar kar d’tour. Solon ou, té i sar fé pèy z’inpo bann rish solman épi épargn bann klas moiyène. Touléka, la bien roul azot dan la farine, zot, bann rouj de fon, pars zot parti lé pa an bon éta, d’apré sak mi konstat. Astèr, zot i rod dévir kazak kont Hollande ? Zot i pans sa va sov azot. Va sov azot sansa va anfons azot in pé plis ankor ? Tok ! Pran sa pou toi !

Justin la fé pou répons :
Mon vié matant k’i koz touzour la boush rouvèr,
Konm ou mèm, mi oi François Hollande lé an gran difikilté. Z’ènmi i mank pa li : dan la droit, dan la gosh, dann Parti sosialis galman, dann Fron nasional parl pi. Mariaz pou tout i mèt la droit dann shomin. Shanjman éskolèr i mèt bann amontrèr épi bann paran dan la ri, l’éskandal l’évazion fiskal i mèt in pé tout demoun dan l’malkontantman. Shomaj, la fèrmtir l’antropriz é bann z’ouvriyé lé bandé an trant sis.... Mi pans i fo arèt tap dsi sak la mèt aou an plas, arèt tap dsi bann moun i pé tonm dakor èk ou. Na in prinsip i di, i fo divizé pou régné. Oui, mé diviz out bann z’ènmi, pa out bann z’ami. Tok ! Pran sa pou ou !

NB : Sak mi anparl an o la, sé pou la Frans sirtou, pou La Rénion nana d’ot z’afèr pou fèr. Kosa ? Arèt la mizèr noir konm la shart l’Ermitaz i di. Rénioniz bann z’anploi ! Koriz bann tèks dsi bann kontra, zot lé pa bon. Tienbo kont l’intéré bann plantèr. Mi arèt la, pars nout parti dopi lontan i arèt pa propozé. Si té i ékout ali in pé ?

Justin