Mi souvyin, na byin lontan, moin la parti dann in péi lavé konète la guèr kolonyal, épi li lavé difikilté pou rant dann shomin la pé, pou rézon k’apré la guèr lo pèp la divizé.
Alor, bann jenn, lavé vanj pou zot péi, té i sèy alé partou pou rékonsilyé lé z’inn avèk lé z’ot, pou angant azot, pou marsh la min dan la min.
An parmi l’avé inn, té in shèf dan la robélyon. Li ossi, té i sava partou pou sèy rétablir linité rant bann patriyot.

Mi ansouvyin ankor sak li té i rakont dann son bann rényon. Li té i di, in zour, dann in montagn dé solda son group la batay. Li la pran sak lété pli anrajé épi li la di : « Batay pa avèk li, batay avèk moin. Mé avan sa, m’a anmar inn out dé bra dann out do ! ».
Lo boug la di ali : « Shèf, mi pé pa batay konmsa, ou sar tro for pou moin ! ».
Lèr-la, li di lo boug kossa li anpans in pèp i amoindri son fors par la divizyon ? Li domann lo boug si li pans pa lo bann zènmi i sar pa tay lo pèp an pyès san lèss ali in shans pou ranport la viktoir ? Lo boug la rokonète son shèf lavé rézon.

Pou kossa mi di sa ? Pars dann télé, moin la vi in sobatkoz rant bann partizan nout kiltir, nout lidantité é momandoné zot la divizé déssi la késtyonn la MCUR dèstiné zistoman pou mète anlèr nout kiltir, ranfors nout linité é nout lidantité.
Alor mi di : bann vré zènmi, si zot i oi sa, zot i doi ète kontan kan ni diviz anou, pars sé konm si ni sava la guèr èk in min anmaré dann do !

Justin