Na poin lontan, la anshèv la prizon Domenjod : sa la koute in bon moné ! Par-la soisant-dis milyon lero. Demoun la pa si tan-tèlman parl lo pri. In bann la grogné pars, solon zot, té i maltrète pa assé bann prizonyé !

Tou lé z’an, i rouv lisé, i rouv kolèz HQE : sa i koute dé mil-é-dé san. Mi pans pa moin la antann, shak rantré, in bann apré kakayé, par si, par la, pars i kout tro la moné… !
Poitan, sa i kout pa aryink dé pti katsou : lisé Sainte-Anne lé prévi pou koute trann-kat milyon lero. Sirman plis kan sar fini pars i pé pa konète par avans la rogoumantasyon sak i fo pou fé batiman.

Lé vré, larzan i trouv pa sou la pate shoval é i fo manyé ali byin konm k’i fo, san gaspiyaz. Mé la pa pars in n’afèr lé shèr pou fé ké la gaspiy larzan. Mé sak mi koné, sé k’shak foi l’Erop la anvoy in misyon issi La Rényon, shak foi la di la byin manyé larzan. Poitan banna la pa marmay lékol… ! I gingn pa boush z’ot zyé fasilman !

Bin alors, pou kossa kan La Réjyon i déside fé in gran lékipman, in bann i kriy konm koshon apré tyé ? Pou kossa in pé i di : la pa lèr pou fé sa, lé tro si, lé tro la, lé tro shèr étsétéri-étsétéra-la ké lo ra ! Pars sé La Réjyon k’i fé ? Sansa pars in pé i èm pa kan i mète La Rényon anlèr ? Dizon, daoir sé sa !

Justin