• Matant Zélida la ékrir Justin :
Mon shèr nové, mon spès salté !
A, bann rouj-de-fon téi kroi d’ète mèr, dann in komine, sé in n’afèr fasil ! Lé vré zot la déboulone lo mèr Zan-Pol ! Lé vré, pou zot sé in gran viktoir ! Mé shak médaye nana son rovèr, in koté na tèt, in koté na flèr : mi vé dir nana in bon mé galman in mové koté ! É, kan la plui i grenn, kan dolo i koul partou, kan kanal kabiné i pète... kosa i fé la ? I fo oir si ou i gingn amènn out afèr byin mèm, sinon an sharète shaviré. Moin la antann Zan-Mari, garson son papa, di konm de koi, lo mèr koméla la pa konète byin amènn son bark ! Rokoné in kozman konm sa i port ! Moin lé kontan, moin lé fyèr pars konm di lo kont : "Bon shyin i shas dé ras !"

• Justin la fé pou répons :
Mon vyé matant, toultan dan lérèr !
A bon ! Ou i kroi lo Zan-Pol sansa lo Zan-Mari, inn té mèr dépi tan-é-tann zané, l’ot té prézidan la CIREST na lo droi la parol sa ? Kan ou la mèm pa gingn fé in bon sistèm pou évakyé lo d’plui, kan ou la mèm pa rogard koman i fé la kaz dann out komine, kèl koté i fé, kèl danzé nana, kèl prékosyon i fo prann, ou na droi la parol ou la ? Alors, ou i kroi ou lé an droi kritik sak lé la dépi dé zour ? I vo myé ou i rès dann tribine épi ou lès bann zouar zoué lo mats, pars so kou issi, la pa séléksyone azot. Provèrb, pou provèrb, moin na inn lé pli préférab sak ou la di, é i aplik myé lo Zan-Mari. Provèrb-la, i di konmsa : "Kalbas amèr i suiv la rasine !". Dizon plito konmsa !

Justin