La fine pas promyé tour z’éléksyon prézidan. Dann dé somèn, sar lo dézyèm tour. Konm ni gingn pa lir dan lo mar kafé, ni koné pa kisa i sava èt prézidan. Lé shoz i prézant pa mal, donk ni pé an avoir l’éspoir lo pti prézidan bann rish i gingn in rès trankil é François Hollande lé riskab gingn prézidan. Mé lé vré, in match lé fini arienk kan l’arbit i done son kou d’siflé pou la finisyon. L’èr-la, i rès bann militan dé somèn pou fé avans lé shoz.

Dann promyé tour z’éléksyon-la, moin lé sir in pé va tir sak zot i apèl bann z’ansègman, mé moin pèrsonèl, mi vé solman fé dé romark. Promyé romark, demoun La Rényon la done Hollande in mazorité absoli promyé tour, par-la sinkant-troi pour san. Sa in gran résponsabilité pou li, si li gingn z’éléksyon. Anplis ké sa, in pé sondaz i di konm de koi li va gingn soisant-kinz pour san dézyèm tour. Sé dir galman l’éspoir bann Rényoné i mèt dan z’éléksyon bononm-la. I fo pa nout l’éspoir i kas par bout.

Dézyèm romark ni pé fé, sé la gosh nana in bon mazorité La Rényon : si i mèt tout la gosh ansanm, sa i fé plis soisant pour san dmoun. Plis soisant pour san, sa i fé bokou, é nou na moiyin fé mord la pousyèr la droite, si ni ariv trouv shomin l’inité. Zot va di amoin lé mal parti, pars nou lé pli divizé ké zamé. Mi pans kant mèm la sityasion nout péi i dovré obliz anou fé l’inyon, avèk in bon program pou dévlop nout péi. Dizon nout program komin anou.

 Justin