Oté

Dizon sa lé konm in l’ord lingistik inzis – in lord lingistik makro si zot i vé !

Justin / 25 novanm 2019

JPEG - 43.6 ko

Mé zami, konm moin la di azot vantredi, moin la ékout in konférans é si moin la pa konprann tout, moin la sézi in trik té i di konmsa : tout marmaye kisoi son lang matèrnèl épi son kiltir matèrnèl néna in for kapasité pou aprann tout lo mékanism son lang matèrnèl rant vin épi trant moi. Apré l’èr lé pli difisil, avan l’èr la pa l’èr.

Astèr mon koko d’tète i komans mouline so linformasyon-la é ala kosa li majine : dizon in marmaye kréol rényoné, li parl kréol rényoné é kan li rant lékol matèrnèl li koné son lang konm son famiy épi son l’anvironeman l’aprann ali. Dizon li lé kréolofone rényoné san pour san. Ni pé di, li néna in bon baz dépar pou li komans mète la konésans dann farfar son tète, son mémoir si zot i profèr… Li pé aprann la vi, aprann la syans, aprann son kiltir é si é sa é patati é patata.

Oui, sa sé in n’afèr i bote amoin ! Mé si kan li rant lékol i komans koz avèk li an zétitoi, koman li fé la ? I fo li arkomans aprann lo zétitoi é l’èrla, li la fine dépass son trant moi li la é son mashine pou aprann i kol pi bien avèk sak nou la fine di pli o, vi ké li lé pli pèrforman pou apann son lang matèrnèl épi lo bann mékanis prinsipal rant vin épi trant moi. Alor, kosa k’i éspass dann son tète kan i ariv ali sa ? Dizon kan li rant lékol matèrnèl a popré laz troi zan.

Pou komansé ni pé di : « Marmaye-la la pèrd son tan li-la ! Vik son mashine pou aprann la konésans i ansèrv pi pou arien ». Lé vré, sanm pou moin, i li lé dann lob ligasyon aprann lo zétitoi-fransé si zot i vé ! Pars la loi lingistik dann La frans i di la lang lédikasyon sé la lang bann fransé é sé dann fransé lo marmaye nou la site son ka anlèr-la, i doi aprann-kapt bann konésans é goumant son pouvoir d’konète-son pouvoir konitif si i pé apèl sa konmsa.

Ala li doi pans li l’apré gaspiye son tan. Sa i vé pa dir par la suite li pé pa ramass d’ot konésans, li pé, mé son dis moi rant vin épi trant moi sé gaspiyaz sa é pa par son fote ali, pa par la fote son paran ni l’antouraz mé par raport la loi la fé in l’ord lingistik épi in l’ord édikatif lé pa zis-la loi makro an parlan in pé vilgèrman.

Ala mon bann zami ousa kozman mi anparl azot i amenn amoin.I amenn amoin pou di lékol lé pa fé pou bann zanfan rényoné zistoman par rapor so bate an aryèr moin la di an-o la., so pèrt-tan dis moi minimome.A ! Zot va di moin l’apré rode dézord moin la. Non ! sinploman mi di lékol i doizète fé pou bann zanfan é isi pou bann zanfan tèl ke zot i lé é non d’apré sak i loi makro i di zot i doizète…A ! Mète lo zanfan dann sant lo dispozitif lédiksyon ? Moin lé dakor, mé pa konmsa siouplé ! Pars konm i fé la, i bord azot in poin sé tou.