Oté

Do bèr, larzan do bèr, épi la krémyèr an mèm tan ! Ousa sa !

Justin / 4 séptanm 2020

JPEG - 43.6 ko

Mézami, souvan dé foi, mi antann désèrtin kolonyo apré di kozman moin la mark an-o la. Mi konpran bien sak bana i vé dir mé mi konpran sirtou sa sé in n’afèr insiltan pou nou kolonizé-néokolonizé si zot i vé-La Rényon.

Mi gnor pa pou in pé La Rényon i égzis solman dopi lo zour zot la mète lo pyé Térin l’aviyon zilo. Donk sa i vé dir nou néna dézour légzistans pou in pé é zot i trouv anou kaziman inpèrtinan kan ni rovandik nout lidantité… Dann zot léspri in lidantité i fé pa an in zour, i fo lo tan, é i fo listoir. Alé oir pou zot nou néna ni lo tan, ni listoir, donk nyèt pou nout lidantité.

Romark azot bien, si ni ariv a fé trènn nout zorèye dann milyé kolonyo, i fodré pa ni étone anou ké lo bann mèm i tras in kroi dsi nout lidantité réyonèz, i tras an mèm tan in kroi dsi nout kalité d’fransé. Pars an finnkont pou zot nou lé fransé kan zot i vé pa rokonète nout lidantité rényonèz mé nou lé kréol kan i zot i vé park anou dann nout kalité d’fransé ényèm zone.

In roprosh mi fé banna ? Non mi fé pa zot kalité roprosh konmsa pars pou moin nou lé rényoné. Alé pa dir amoin nou lé fransé avan bann moun Nice épi La Savoie. La fisèl lé tro gross pou moin. Alé pa dir amoin non pli nou lé fransé ényèm zone pars lé pli sinp pou moin kan mi pans nou lé rényoné in poin sé tou. Nou lé konm nou lé, nou lé sak nou lé, ni domann pa zot lotorizasyon pou ète konm ni lé é sak ni lé. Sé in l’otorizasyon ké ni done anou par nou mèm san domann siouplé.

San domannn siouplé bann kolonizé sansa néo... Lobèr, larzann lo bèr épi la krémyèr anmèm tan ? Ni vo pliské sa mon bann.