Médam zé Mésyé, la sosyété, mi vé dir azot zordi na poin arien lé san pour san bon é san pour san mové. Kozman moin la mark an-o la sé pou rapèl azot in sinp vérité konmsa. Moin l’avé in bon dalon é in zour son janm la kasé é l’èr-la doktèr la romark li l’avé in tabatir an kite ta bouète. Olèrk li souplègn, li la di solman : « Dann tou mal néna in bien. In maladi trouvé lé a moityé géri. » I fo dir mon dalon la lété in loptimist romarkab é konm i di souvan, la pa sak téi ariv ali i kont, mé koman li téi pran l’afèr : par lo bon bout sansa par lo mové bout, pou tir ali d’in mov èz pass, sansa pou anfons ali. Sa i fé pans amoin in kozman moin la fine mark dann zoinal é k’i du konmsa : « Sak i ariv aou i kont pa, sak i kont sé la manyèr ou i pran lé shoz. ».. Alé ! Mi kite azot astèr é mi lèss azot rofléshi la dsi. Ni artrouv pli d’van. Sipétadyé.