Dolo i mank anou ? Moin la anvi réponn par oui : pou kosa ? Pars sito ké la sézon dé plui la fini nana in rasyonmann d’lo in pé partou dan La Rényon. Lav pi loto li ! Aroz pi zardin li ! Aroz pi léspas vèr li ! Antansyon la polis minisipal talèr i mète aou in prosé vèrbal. Shak ané lé konmsa é dopi bél-az é bo-tan.

Mé moin la anvi galman réponn par non. Pou kosa ? Pars i pé pa dir sé la plui k’i mank anou sirtou dann désèrtin kartyé la Rényon... L’androi konm di lo kont, la plui i tonm konm vash k’i piss. Moin la antann dir Takamaka, la plui i tonm par uit mète otèr shak ané. Moin la antann osi, dann in tan gro plui, dann sèrtin kartyé konm La plène Palmis, sansa Salazie é d’ot ankor la tonm plis in mète lo dann vinn-katrèr. Parl pi la plui la tonm dsi Sin-zozèf épi Sin-Filip nana dé somenn : demoun i diré l’avé zamé oir in n’afèr konmsa.

Alor nou lé mal roganizé ? Pou kosa la plui i tonm partou dsi bann toi, pèrsone i ramas pa, Pou koué na poin in l’obligasyon pou ramas lo la ? Pou koué i trap pa dlo dann so gro l’èr sho i pèz dsi nou dann tan la shalèr kan I shale ? Mète la klim épi ramas dolo. Mèm pa dann in nuite ou I pé ramas sink sis lit lo. Donk dolo nana ? Mé li lé mal ramasé.

Na poin lontan moin la lir dann « 7 lames la mer » in gran l’artik dsi lo gran lak dann milyé la Rényon. Sa la intérès amoin mèm si la poin la prèv li té i égzis . Pou kosa ? Pars tout lo la plui i sava pa la mèr san-pour-san é mèm si li rode alé nana moiyin kal ali. Nout parti i anparl bann rotni kolinèr dsi bann planèz-bann pant - é nana pou trapé fransh vérité… Sirtou avèk lo rolèvman lo nivo la mèr k’lé riskab mélanz avèk nout bon lo épi gate ali, é donn anou solman dolo soumak.

Antansyon pa ké lo tro d’lo ké nou nana i shanj pa inn dé sé zour an pa z’asé.