Mi oi, dann télé dopi dé troi zour, mi antan dann radyo galman, La Rényon lé an défisit dolo é lé pli pir sète ané, ké dann l’ané 2013. Donk talèr i tard pa pou dir aroz pi bann plant, lav pi loto, arèt gaspiy dolo... Konpran amoin bien ! Mi di pa bann mézirèr la nap fréatik la tronpé. Mi di pa zot méziraz lé pa bon. Mi di pa zot na poin lo zyé an fas lo trou... mi di pa tousala… Solman mi pans in n’ot manyèr zèr dolo lé bien nésésèr. Pou kosa ?

Pars toulmoun i koné bann tiyo i amenn dolo lé pa ranjé konm ki fo. In tan téi di, dann komine Sin-Pol in gran poursantaz dolo té i ariv pa dann robiné, té i dévèrs dann shomin. Si zot i pass Sint-Roz, zot i pé oir la kantité mèt kib dolo lé gaspiyé dann lo por. Zot i souvien, kan la fé lo baskilman d’lo l’est dan l’ouest kosa l’arivé. Mi domann amoin si lo dévèrsaz dolo lé fini sansa lé pa fini... pars i fé pi dézord la dsi. Donk si ni mank dolo sé ké ni gaspiy vèy pa koman, pa nou bann ti kolon mé lo sistèm dolo. La Rényon la pa in dézèr kant mèm.Dolo i mank pa nou !

Ousa i lé bann rézèrvoir pou ramas lo d’plui ? Ousa i lé Bann rotoni kolinèr an kantité sifizant ? Moris la-ba nana in bann gran lak artifisyèl pou ramas le lo.Ousa k’i lé lé n’ot ? Ousa i lé in bon rézo tiyo pou pa zète dann vid lo lo kapté ? Ousa i lé bann barj pou ramas dolo la-ba Sint-Roz épi amenn ayèr ? Si i fo, ousa i lé bann éstasyon pou ramas dolo é pou trété, konmsa i ansèrv in n’ot kou, in n’ot kou ankor plito ké zète dan la mèr. Pou finir, ousa i lé, si la bézoin lizine solèr pou désal lo d’mèr. I paré isi La !rényo, dann désèrtin landroi i bat rokor la plui… Ziska ui mète dann Takamaka.

Sèryèzman, asé roul anou kari dsou d’ri ! asé fé prann anou po d’shanm pou pla kouvèr ! Dolo nana La Rényon mé i fo in n’ot politik zèstyon, i fo in n’ot politik prodiksion. Konm di lo kont : dolo i mank anou ! arèt in kou lé ga ! Asé fé prann anou torshon po sèrvyète, po d’shanm pou pla kouvèr, makaroni pou la bouji.

Justin